Shqiponja dy krenare në rrethrrotullimin në hyrje të Tiranës, në zonën që njihet si Dogana, dhe që mbante emrin Sheshi “Shqiponja”, nuk do të jetë më! Projekti i Unazës së Madhe përfshin edhe shembjen e saj. Këtë të shtunë, fadromat kanë shembur shqiponjën mbi rrethrrotullim.

Sheshit tashmë i ka mbetur vetëm emri, pasi “Shqiponja” simbol i tij, është hequr, për t’i hapur rrugë projektit për ndërtimin e ‘Unazës së Re’.

‘Shqiponja’ është vepër e artistit Albi Cifligu, me kontributin financiar të familjes tetovare “Destani”, e vendosur në sheshin e pagëzuar me të njëjtin emër në hyrje të kryeqytetit.

‘Shqiponja’, vepër e derdhur në çelik të rëndë, me lartësi 10 metra (shqiponja, 6 metra e lartë dhe me bazament katër metra), u vendos me rastin e 100-vjetorit të Pavarësisë në një ceremoni të organizuar asokohe nga kryeministri Berisha e kreu i Bashkisë Lulzim Basha, në nëntor 2012.

Ndërkohë, në zonën e Astirit dhjetëra qytetarë protestuan kundër këtij projekti, ku për finalizimin e tij duhet të shemben banesat e tyre.

Konkretisht ata kërkojnë dëmshpërblim me vlerë reale të tregut, dhe më tej do të lejojnë shembjen e banesave të tyre.

Aktualisht ata kanë protestuar prej 8 ditësh, ndërsa sot situata u bë kaotike pasi bllokuan të dyja anët e rrugës në Unazën e Re duke lënë në pritje të gjata shoferët, me të cilët pati edhe përplasje.